'ഞാന് ദൈവവിശ്വാസിയായ കമ്മ്യൂണിസ്റ്റ്': അബ്ദുല്ലക്കുട്ടി
ദൈവവിശ്വാസിയായ കമ്മ്യൂണിസ്റ്റാണ് താനെന്ന് സി.പി.എം യുവനേതാവും കണ്ണൂര് എം.പിയുമായ എ.പി അബ്ദുല്ലക്കുട്ടി. 'ഒരാള് കമ്മ്യൂണിസ്റ്റുകാരനായതുകൊണ്ട് അയാള്ക്ക് ദൈവത്തില് വിശ്വസിക്കാന് പാടില്ലെന്ന് എവിടെയും പറയുന്നില്ല. മാര്ക്സിസ്റ്റ്-ലെനിനിസ്റ്റ് തത്വങ്ങളിലോ പാര്ട്ടി മാനിഫെസ്റ്റോയിലോ ഇങ്ങനെയൊരു കാര്യം പറയുന്നില്ല. പാര്ട്ടി കേഡര്മാരില് ഏറെയും തികഞ്ഞ വിശ്വാസികളാണ്'. പ്രമുഖ ഓണ്ലൈന് പോര്ട്ടലായ റീഡിഫിന് നല്കിയ അഭിമുഖത്തിലാണ് അബ്ദുല്ലക്കുട്ടി തന്റെ നിലപാടുകള് വീണ്ടും ആവര്ത്തിച്ചത്. സാമൂഹികാവസ്ഥകള് മനസിലാക്കുന്നതില് മതം പ്രധാന പങ്കുവഹിക്കുന്നു. ഞാനൊരു സാധാരണ മനുഷ്യ ജീവിയാണ്. ദൈവവിശ്വാസിയായ മുസ്ലിമുമാണ്. അതുകൊണ്ടാണ് ഞാന് ഉംറ നിര്വഹിക്കാന് പോയത്. ഇത് മറ്റ് മതങ്ങളോടുള്ള എന്റെ ബഹുമാനം വര്ധിപ്പിച്ചിട്ടേയുള്ളൂ. ഈശ്വരവിശ്വാസിയാണെന്നതില് താന് അഭിമാനിക്കുന്നു. ഇന്ത്യ പോലൊരു രാജ്യത്ത് അതും മതങ്ങള്ക്ക് ആഴത്തില് വേരുള്ള നാട്ടില് മതത്തെ സംബന്ധിച്ച് നിലപാട് വ്യക്തമാക്കേണ്ടത് പാര്ട്ടിയുടെ കാര്യത്തില് വളരെ പ്രധാനമാണ്. പാര്ട്ടി അനുവര്ത്തിച്ചുപോരുന്ന നിലപാടിനോട് ഘടകവിരുദ്ധമായ ഈ സമീപനം രാഷ്ട്രീയ പ്രത്യാഘാതങ്ങള് സൃഷ്ടിക്കില്ലേ എന്ന ചോദ്യത്തിന് ഇത് തന്റെ രാഷ്ട്രീയ ഭാവിയെ ബാധിക്കുമെന്ന് കരുതുന്നില്ലെന്നായിരുന്നു അബ്ദുല്ലക്കുട്ടിയുടെ മറുപടി. 'ഞാന് പ്രകടിപ്പിച്ചത് അത്രയും ഭൂരിഭാഗം കേഡര്മാരുടെ വിശ്വാസവും ചിന്തകളുമാണ്. നിരവധി നേതാക്കളെ പലഘട്ടങ്ങളിലായി പുറത്താക്കിയ പാരമ്പര്യമുള്ള സി.പി.എം ഇനി ഒരു തവണകൂടി നിങ്ങള്ക്ക് സ്ഥാനാര്ത്ഥിത്വം നല്കാനിടയില്ലെന്നാണല്ലോ പൊതുവേയുള്ള സംസാരം എന്ന ചോദ്യത്തിന് അത് പാര്ട്ടിയാണ് തീരുമാനിക്കേണ്ടതെന്നായിരുന്നു യുവനേതാവിന്റെ മറുപടി. പാര്ട്ടിക്ക് എം.എല്.എയോ, എം.പിയോ ആയി തന്റെ സേവനം വേണമെന്ന് തോന്നുന്നുവെങ്കില് അത് നിര്വഹിക്കാന് തയാറാണ്. നാളെ തീരുമാനം മറിച്ചാണെങ്കില് ഒരു സാധാരണ പാര്ട്ടി പ്രവര്ത്തകനായി തുടരും. നാഡീജ്യോതിഷത്തെക്കുറിച്ച് മാതൃഭൂമി പ്രസിദ്ധീകരണമായ യാത്രയില് അബ്ദുല്ലക്കുട്ടി എഴുതിയ കുറിപ്പായിരുന്നു ആദ്യം വിവാദമുണ്ടാക്കിയത്. ചെറിയപെരുന്നാളിന് അബ്ദുല്ലക്കുട്ടി പരസ്യമായി നമസ്കാരത്തില് പങ്കെടുത്തിരുന്നു. ഇത് പാര്ട്ടി വൃത്തങ്ങളില് ചര്ച്ചയാകുകയും ചെയ്തു. പിന്നീട് പല പ്രസിദ്ധീകരണങ്ങളിലൂടെ മതത്തെ സംബന്ധിച്ച തന്റെ ദൃഢമായ നിലപാട് അദ്ദേഹം പല തവണ ആവര്ത്തിച്ചു. ഇപ്പോള് ഒരു പ്രമുഖ ഇംഗ്ലീഷ് പോര്ട്ടലിന് അഭിമുഖം നല്കി തന്റെ നിലപാട് അബ്ദുല്ലക്കുട്ടി വീണ്ടും ആവര്ത്തിക്കുമ്പോള് അദ്ദേഹം മുന്നോട്ടുവെക്കുന്ന കാര്യങ്ങള് സി.പി.എമ്മില് ദേശീയതലത്തില് തന്നെ ചര്ച്ചാവിഷയമാകുമെന്ന് ഉറപ്പാണ്. തിരഞ്ഞെടുപ്പ് ആസന്നമായിരിക്കുന്ന സാഹചര്യത്തില് അബ്ദുല്ലക്കുട്ടിയെ പോലൊരു നേതാവിനെതിരെ നടപടിയെടുക്കാന് പാര്ട്ടി മുതിരുമോ എന്നാണ് ഏവരും ഉറ്റുനോക്കുന്നത്.
No comments:
Post a Comment